Nýr 10 vikna hópleikur í getraunum KFS hefst um næstu helgi. Árangur okkar í getraunum heldur áfram að spyrjast út og alltaf er þeim að fjölga sem vilja taka þátt í þessu. Á síðasta ári var KFS í 9. sæti yfir landið í fjölda seldra raða, sem sýnir hversu mikilvægu starfi doktor Hjalti er að skila í þessu. Þá er hann einstaklega góður að næla í vinninga fyrir fólk, en venjan hefur verið sú að lágmark einn hópur hefur fengið utanlandsferð í hverjum hópleik. Stuðninginn sem fólk sýnir KFS með því að taka þátt í getraunum félagsins ber að þakka, en þetta er langstærsti tekjupóstur félagsins á hverju ári og ekki veitir af með þrjú lið að norðan í 2. deildinni í sumar líkt og síðasta ár. Uppá síðkastið hefur hvert sölumetið á fætur öðru verið slegið sem sýnir hversu mikill áhugi er á þessu. Þetta fer þannig fram að hver leikur stendur í 10 vikur og eru borgaðar 5.000 kr. fyrir svokölluð getraunahlutabréf, semsagt tippað fyrir 500 kr./viku. Hjalti sér um að tippa fyrir fólk og raðar niður í hópa. Venjulega eru þrjú getraunahlutabréf saman í hverjum hópi og geta fleiri en einn geta sameinast um bréf. Ef hópurinn vinnur (ekkert ef) skiptist vinningsupphæðin jafnt niður á hlutabréf. Þið verðið ekki svikinn af því að láta Hjalta tippa fyrir ykkur, held það sé leitin að öðrum eins tippara á landinu. Hann er búinn að fá sex sinnum 13 rétta á sl. 12 mánuðum þannig að kann þetta. Þeir sem hafa áhuga geta haft samband við Hjalta í s. 481-2632 eða sent honum tölvupóst á framh@simnet.is og fræðst um þetta.