Hvar: í Glerskálanum í Drífanda (Hótel Eyjar) og er gengið inn að norðan.
Hvenær: byrjum kl. 20:00, matur um 20:30
Matur: Svín og kjúklingur ásamt ýmsu gómsætu meðlæti og léttu nasli milli rétta.
Drykkir: já, eins og menn geta í sig látið, en þurfa þó að mestu að koma með þá sjálfir, enginn bar á staðnum.
Kostar: 1.500 kr. á manninn (ræðan innifalinn í verðinu), ekkert kortavesen bara cash

Þá mun Reykjavíkurakademía KFS vera að undirbúa eitthvað svakalegt atriði. Þá er hugsanlegt að Spýtan hringi inn atriði, en óvíst er að hann komist.
Endilega látið mig vita sem ekki eru búnir að því, hvort þið mætið ekki.

Nú er búið að finna stað fyrir okkur og ætlum við að slútta í glerskálanum í Drífanda (Hótel Eyjar) og skemmta okkur þar yfir mat og drykk. Flautað verður til leiks kl. 20:00 Mat ætlum við að hafa á boðstólnum og hugsanlega einhverja drykki og fyrir fátæka námsmenn verður verðinu stillt í hóf, 1.500 kr. á manninn (konur eru líka menn), óbreytt frá fyrra ári. Hvet alla að láta sjá sig. Að lokum skunda síðan þeir sem vilja á ball í Höllinni. Þeir sem ætla að mæta láti mig vita í s. 844-3023 eða á odi@eyjar.is eða melda sig inn á spjallinu. AKFS mun verða með eitthvað sprell og svo geri ég ráð fyrir að Sæþór verði með myndavélina á lofti.

Hugmyndin er að slútta 25. september nk. og er AKFS með málið. Skilst að það sé einhver stórhljómsveit í Höllinni þannig að ætti að geta verið fínt kvöld. Á eftir að finna stað undir hópinn en það ætti nú allt að hafast. Vonandi sjá sem flestir sér fært að mæta.

Þá er þessari knattspyrnuvertíð lokið, en á sunnudag tók KFS á móti ÍR í hreint magnaðri lokaumferð í 2. deildinni. KFS hefði með sigri getað tekið ÍR með sér í 3. deild að ári. Það var greinilegt að mikið var lagt í sölurnar hjá ÍR, voru meira að segja með stuðningsmenn með sér, sem reyndu allt hvað þeir að gátu að múta Gunnari Bergi markverði þegar þau voru að bíða á Bakkaflugvelli. En Gunnar er svo múraður maður að hann þurfti ekki á neinum aukagreiðslum að halda, þannig að ekki tókst það hjá ÍR.
KFS var ekki með hefðbundna liðsuppstillingu í þessum leik, en Sindri Viðarsson markamaskína (að eigin sögn) var settur á miðjuna og ætlaði sér að skora mark á þessu tímabili. Þá var Jóhann Sveinn afturliggjandi miðjumaður og Hjalti Jóh. var mættur aftur og spilaði sem miðvörður ásamt Stebba Braga. Leikurinn byrjaði fjörlega og var greinilegt að ÍR ætlaði sér sigur í þessum leik, þeir börðust vel en það gerðu leikmenn KFS einnig. En eftir aðeins um 8 mín. leik voru ÍR búnir að skora mark, en eftir það sótti KFS meira og var Sindri þar fremstur í flokki en hann átti nokkur skot að marki, en ekki tókst honum að skora. Þrátt fyrir að fá ein tvö dauðafæri í fyrri hálfleik tókst KFS ekki að jafna leikinn. Staðan því 0-1 í hálfleik. Varamenn héldu síðan mikla sýningu í leikhléi, þó sérstaklega formaðurinn.
Í síðari hálfleik var það sama á ferðinni, en eftir aðeins um 10 mín. leik sluppu ÍR upp hægri kantinn og náðu að skora sitt annað mark. En aðeins nokkrum mínútum seinna náði hinn stormsenterinn í liðinu, Jóhann Sveinn að skora glæsilegt grísamark af 40 metra færi, en markmaðurinn hafði brugðið sér í lautarferð, annan leikinn í röð skilst okkur. Hans fyrsta mark í sumar. Skömmu seinna náði Davíð Egils að skora sitt fyrsta mark í sumar eftir góða sendingu frá Ganna, eftir að boltinn hafði farið yfir allan pakkann eftir hornspyrnu frá Sæþóri. Nú var farið að fara um ÍR en staðan í leik Víðis og KS var 1-0 sem þýddi að ÍR var á leið í 3. deild. Nú héldu menn að KFS næði að krækja í sigur, en ekki liðu margar mínútur áður en ÍR tókst að komast yfir 3-2. Enn voru um 20 mín. eftir af leiknum má segja að aðstandendur ÍR hafi verið orðnir stressaðir yfir gangi mála. En lokatölur urðu þessar, 3-2 og með sigri tryggði ÍR sér veru í 2. deild að ári, en Víðir féll niður í 3. deild. Á toppnum gerðust þau tíðindi að Leiknir sem búið er að vera í efsta sæti í allt sumar, tapaði síðasta leiknum fyrir Víkingi Ó. og við það misstu þeir af sæti í 1. deild, en Víkingur og KS fóru upp. Eitt norðan lið upp en hugsanlega koma Völsungar aftur niður í 2. deild. Þá gerðust þau merku tíðindi að feðgar léku saman í þessum leik, en Hjalti kom inná rétt í lokin og náði nokkrum mín. með Trausta. Þá léku bræðurnir Hjalti og Sæþór Jóh. allan leikinn. Helstu tíðindi leiksins voru að Sindri náði ekki að skora og þar með ekkert í sumar, þrátt fyrir nokkrar góðar tilraunir í leiknum. En ég vil þakka leikmönnum og stuðningsmönnum fyrir sumarið en menn voru að leggja mikið á sig í sumar, bæði í sambandi við vinnu og ferðalög. Þá er AKFS sérstaklega þakkað, en þeir hafa verið pantaðir á bikarúrslitaleik ÍBV og Vals um næstu helgi, þannig að hróður þeirra berst víða.
Liðið: Gunnar, Hjalti, Stebbi Braga, Valdi, Ganni (Svenni), Jóhann, Davíð (Hjalti K.), Sindri, Stebbi H., Sæþór, Siggi I. (Trausti)

Á morgun fer fram síðasta umferðin í 2. deild, en þá tekur KFS á móti ÍR. Þessi síðasta umferð er mjög spennandi bæði á toppi og botni. Þrjú lið berjast um sæti í 1. deild að ári og þrjú lið geta farið niður í 3. deild með KFS. Leikurinn á morgun fer fram á Helgafellsvelli og hefst hann kl. 14. Heyrst hefur að Sindri Viðars ætli sér að skora á morgun, en elstu menn muna ekki eftir marki frá honum. Þá verður Yngvi í leikbanni og spurning hvort Stebbi Hauks taki markakóngstitilinn af Yngva, en til þess þarf hann að skora þrennu á morgun. Þá hvíslaði því að mér lítil fluga að Gunnar Bergur ætli ekkert að tjá sig í leiknum á morgun. Þannig að ég hvet áhorfendur til að mæta á völlinn og verða hugsanlega vitni að sögulegum viðburðum.