Framherjar spiluðu í dag í 3. deild Íslandsmóts innanhúss. Má segja að allt hafi gengið upp sem þurfti að ganga upp. Fyrsti leikurinn gegn Neista D. vannst 6-1 með mörkum frá Stebba Hauks, Davíð, Sigga Inga, Dudek, Styrmi og Stebba Braga. Í öðrum leiknum gegn BÍ lentu Framherjar 0-3 undir en náðu að minnka muninn í 1-3 fyrir leikhlé með marki frá Stebba Hauks. Í síðari hálfleik náðu Framherjar að klára leikinn og vannst hann 4-3 með mörkum frá Hjalta Einars, Styrmi og Stebba Hauks. Tveir sigrar og útlitið nokkuð gott. Fyrir síðasta leik á móti Ægi var ljóst að Framherjar máttu tapa með tveimur mörkum til að lenda í fyrsta sæti. Það leit ekki vel út á tímabili, Ægir komst í 0-3, svo minnkaði Siggi Ingi muninn í 1-3, þeir skoruðu 1-4 en Davíð Egils skoraði annað mark Framherja á síðustu mínútunni og leikurinn fór 2-4. Semsagt tveggja mark tap og eins og mátti. Síðasti leikurinn í riðlinum var leikur Neista D. og BÍ og þurfti BÍ að vinna með fimm mörkum til að ná fyrsta sætinu af Framherjum. BÍ komst í 5-0 og útlitið ekki gott fyrir Framherja, en Neisti minnkaði í 5-1 en BÍ skoraði þá aftur 6-1 en á síðustu mínútu skoraði Neisti og leikurinn endaði 6-2. Þar með var ljóst að Framherjar héldu fyrsta sætinu, með sömu markatölu og BÍ en fór upp á innbyrðis viðureign. Tæpara gat það ekki verið. Stebbi Hauks var markahæstur með 3 mörk. Til hamingju með þetta strákar.

Á morgun, sunnudag, keppa Framherjar í Íslandsmótinu innanhúss og er spilað í Austurbergi. Fyrsti leikur Framherja er gegn Neista Djúpavogi og byrjar kl. 10:23. Síðan er það gegn BÍ kl. 11:55 og síðasti leikur gegn Ægi kl. 13:04. Hvet alla að mæta og kíkja á strákana. Hjalti Einars er búinn að lofa eins marki og hann skoraði gegn FC Iceland um daginn. Eitthvað sem enginn má missa af.

Búið er að breyta æfingatímunum okkar þannig að tímarnir á fimmtudögum falla niður og í staðinn verður við á föstudögum á sama tíma í sama sal, þ.e. kl. 20:30 og byrjar þetta næsta föstudag. Þannig að tímarnir eru þá á mánudögum, miðvikudögum og föstudögum kl. 20:30 alltaf í nýja salnum.

Framherjar leika sem kunnugt er í 3. deildinni innanhúss og verður leikið sunnudaginn 14. nóvember í íþróttahúsinu Austurbergi. Leikjaniðurröðunin er sem hér segir:

kl. 10:23 Framherjar - Neisti D.
kl. 11:55 BÍ - Framherjar
kl. 13:04 Framherjar - Ægir

Nú í lok október samþykkti stjórn KSÍ nýja reglugerð fyrir innanhússknattspyrnu og verður byrjað að leika eftir þessari nýju reglugerð nú 14. nóvember þegar Framherjar leika í 3. deild. Helstu breytingar eru eftirfarandi:

- Varamönnum er fjölgað úr 6 í 7.
- Skylda er að vera með legghlífar.
- Fjarlægð varnarmanna í aukaspyrnum er færð úr 3 metrum í 5 metra.
- Flokkaskipting er aðlöguð að nýjustu breytingum.
- Tímalengd brottvísunar er stytt.
- Óheimilt er að skora úr upphafsspyrnu.
- Markvörður má nú kasta knettinum yfir miðju.
- Ákvæðum varðandi markvörð hefur verið breytt á þá veru að eftir að hann hefur kastað knettinum í leik er honum óheimilt að snerta knöttinn að nýju nema knötturinn hafi farið yfir miðju eða hann hafi verið snertur af andstæðingi. Í 5. aldursflokki og yngri flokkum eru undanþáguákvæði varðandi markvörðinn.

Verður gaman að sjá hvort þessar breytingar munu hafa mikil áhrif á leik liðanna. Reglugerðina í heild sinni má lesa hér.